സന: സോക്കട്ര എന്നൊരു വിചിത്ര ദ്വീപിനെക്കുറിച്ച് കേട്ടിട്ടുണ്ടോ? അറബിക്കടലില്‍ യെമെന് താഴെയായാണ് ഈ ദ്വീപ് സ്ഥിതിചെയ്യുന്നത്. പണ്ടെപ്പഴോ അന്യഗ്രഹ ജീവികള്‍ ഇവിടെ താമസിക്കുകയും പിന്നീട് മനുഷ്യജീവികള്‍ പെരുകിയപ്പോള്‍ അവര്‍ സ്വന്തം നാട് ഉപേക്ഷിച്ചു പോയതാണെന്ന് ഒക്കെ തോന്നുന്ന ഒരു സ്ഥലമാണിത്. ഇവിടുത്തെ എഴുനൂറോളം ചെടിവര്‍ഗങ്ങള്‍ ലോകത്ത് മറ്റെങ്ങുമില്ല. നീലക്കടലും കുള്ളന്‍ മരങ്ങളും വലിയ കൂണ്‍ പോലത്തെ മരങ്ങളും പളുങ്ക് കല്ലുകള്‍ നിറഞ്ഞ തീരവും ഗുഹകളും എല്ലാമുള്ള മരുദ്വീപ്. ലൈഫ് ഒഫ് പൈ സിനിമയിലെ വിചിത്ര ലോകവുമായി ചെറിയ സാദൃശ്യവുണ്ട്.
ഈയടുത്ത കാലത്തായി ഈ ദ്വീപ് വാര്‍ത്തകളില്‍ ഇടംപിടിച്ചതിന് പിന്നില്‍ മറ്റൊരു കാരണമാണുള്ളത്. ഇവിടെ ധാരാളമായുള്ള ചുണ്ണാമ്ബ് കല്ലുകള്‍ സിമന്റ് ഉണ്ടാക്കാന്‍ വളരെ നല്ലതാണ് , അതുകൊണ്ട് തന്നെ തൊട്ടടുത്തുള്ള വ്യവസായികള്‍ ഈ ദ്വീപിനെ കണ്ണുവെച്ചിരുന്നു. എന്നാല്‍ ധാരാളം പരിസ്ഥിതി പ്രവര്‍ത്തകര്‍ ഇടപെട്ടിട്ടാണ് ഈ ”അറേബ്യന്‍ രത്നം’ രക്ഷപ്പെട്ടത്. യെമന്‍ ഇവിടെയിപ്പോള്‍ ധാരാളം ടൂറിസം പദ്ധതികളും കൊണ്ടുവന്നിട്ടുണ്ട്.
Discussion about this post