അർബുദം ബാധിച്ചാൽ ഒരു പക്ഷെ അതിന്റെ വേദനയേക്കാൾ അസുഖബാധിതർക്ക് വേദനിക്കുന്നത് കുടുംബത്തിലെ ഓരോരുത്തരുടെയും ദുഃഖം കാണുമ്പോഴായിരിക്കും. അതിൽ മനം നൊന്ത് ഒന്നുമരിച്ചിരുന്നെങ്കിൽ എന്ന് ചിന്തിച്ചിരുന്ന കാലഘട്ടം അവസാനിച്ചിരിക്കുന്നു. അര്‍ബുദത്തെ ഇപ്പോള്‍ പലരും ഒറ്റക്കെട്ടായി നിന്ന് തോല്‍പ്പിക്കുകയാണ്. മനസ്സിന് ബലം നൽകി ശരീരത്തെ കീഴ്പ്പെടുത്താൻ ശ്രമിക്കുന്ന അർബുദ രോഗത്തോട് തളരാതെ പൊരുതുന്ന കാഴ്ച്ചയാണ് ഇന്ന് നമ്മുക്ക് ചുറ്റും കാണുന്നത്. പ്രിയപ്പെട്ടവര്‍ സ്ട്രോങ്ങായ് കൂടെ ഉണ്ടെങ്കില്‍ രോഗം തോറ്റ് പിന്മാറും എന്നതില്‍ സംശയം ഇല്ല.
അത്തരത്തിൽ പൊരുതുന്ന ഒരു കുടുംബത്തിലെ യുവാവിന്റെ പോസ്റ്റാണ് ഇപ്പോൾ വൈറലാകുന്നത്. അർബുദത്തോട് പൊരുതി ജീവിക്കുന്ന ബിജ്‌മ എന്ന പെൺകുട്ടിയുടെ ഭർത്താവ് ധനേഷ് മുകുന്ദന്റെ ഫേസ്ബുക് കുറിപ്പാണ് ഇപ്പോൾ ചർച്ചയാകുന്നത്. ഭാര്യയുടെ കാമുകനായി കാന്‍സര്‍ എത്തിയെന്നറിഞ്ഞപ്പോള്‍ അവനെ പടിക്കു പുറത്താക്കാന്‍ കച്ചകെട്ടി ഇറങ്ങിയിരിക്കുകയാണ് ഈ ദമ്പതികള്‍.
ധനേഷ് കുമാറിന്റെ കുറിപ്പ് —
“എന്നെക്കാളേറെ അവളെ സ്നേഹിച്ച മറ്റൊരു കാമുകൻ ഉണ്ടെന്നറിഞ്ഞപ്പോൾ തീർത്തും തളർന്നുപോയി”…..
ഞങ്ങൾക്കിടയിൽ നീ ആദ്യം വേദനയായി വന്നു…അവിടെയും ഞങ്ങൾ ജയിച്ചു… വീണ്ടും നീ ഞങ്ങളെ വേദനയിൽ മുക്കി.. അവളിലെ മേനിയെ കീറിമുറിച്ചു കിട്ടാവുന്നതെല്ലാം നീയെടുത്തു… അവിടെയും ഞങ്ങൾ വീണില്ല …. പിന്നീടാണ് ആരുമറിയാതെ നീ അവളെ ഇത്രയേറെ സ്നേഹിക്കുന്ന കാര്യം ഞങ്ങൾ അറിയുന്നത്…. എന്നിട്ടും നീ ഞങ്ങളെ വിട്ടില്ല…. കണ്ണെഴുതി പൊട്ടുതൊട്ടുമിനുക്കിയ മുഖവും മുടിയും ശരീരവും നിന്റെ വികൃതിയാൽ വികൃതമാക്കി…. തീർന്നില്ല നിന്റെ പ്രണയം…. അവളിലെ അഴകിൽ നീ കണ്ണുവച്ചു ഇല്ലായ്മ ചെയ്തു…. “”””””കാൻസർ എന്ന കാമുകനായി നീ ഞങ്ങളെ തേടി വന്നതെ തെറ്റ്… അവളുടെ നെറ്റിയിൽ ഞാൻ ചാർത്തിയ സിന്ദൂരം ഒന്നുകൂടി നീട്ടി വരയ്ക്കും നിനക്കെതിരെ വിധി പറയാൻ “”””””
ശരീരം തളരും… എല്ലുകൾ നുറുങ്ങും.. വേദന അതിലേറെ ശക്തം അന്നവും വെള്ളവും വിശപ്പിനെ വകവെക്കാതെ വേണ്ടാതാവും..
ഇടക്ക് കുടിക്കുന്നകഞ്ഞിവെള്ളംപോലും തിരിച്ചു തുപ്പുന്ന അവസ്ഥ… എങ്കിലും ഞങ്ങടെ മനസ്സിനെ തളർത്താനുള്ള കരുത്തൊന്നും ഇല്ലാതായിപ്പോയി നിനക്ക്….. നിനക്കെതിരെ പ്രതിരോധംതീർത്തത് മരുന്ന്കൊണ്ടു മാത്രമല്ല…. മനസ്സുകൊണ്ടും ഉൾകരുത്തുകൊണ്ടും തകർക്കാനാവാത്ത വിശ്വാസംകൊണ്ടുമാണ്… അർബുദമെന്ന നിന്റെ ഉയർച്ച ഞങ്ങൾ ആഘോഷമാക്കിയെങ്കിൽ…. നീ എന്ന് തളരുന്നുവോ…. അതുവരെ ഞങ്ങൾ പൊരുതാൻ ശക്തരുമാണ്…… ഓരോകീമോയും ഒരു ലഹരിപോലെയായി ഇപ്പോൾ.. 25 റേഡിയേഷൻ പാട്ടുകേൾക്കുന്ന ലാഘവത്തോടെ മുന്നേറിയ ഞങ്ങൾക്ക് ഇനി വരാനിരിക്കുന്ന കീമോകൾ വെറും ലഹരി നുണയുന്ന മരുന്നുകൾ മാത്രം… ഞാൻ സ്നേഹിക്കുന്നതിലേറെ അവളെ സ്നേഹിച്ച നീ ഞങ്ങളെ തളർത്തി കളഞ്ഞെന്ന് തോന്നുന്നെങ്കിൽ അവിടെ നിനക്ക് പിഴച്ചു… വീണുപോയെന്നുള്ള തോന്നലിനേക്കാൾ കൂടുതൽ മനസ്സിൽ വന്നത് വീഴാതിരിക്കാനുള്ള കരുത്തുതന്നെയാണ്…. ആത്മവിശ്വാസത്തിന്റെ ഒരു മതിൽക്കോട്ട തന്നെ നിനക്കെതിരെ ഞങ്ങൾ പണിതുവച്ചിട്ടുണ്ട്….. ഇന്ന് ഞങ്ങൾ ഒറ്റക്കല്ല …. ഞങ്ങൾക്ക് ചുറ്റും ഞങ്ങളുടെ കൂടെ… പ്രാർത്ഥനയുടെയും ….സ്നേഹത്തിന്റെയും … പടവാളേന്തിയ ആയിരങ്ങൾ നിനക്കെതിരെ ശബ്ദിക്കാനുണ്ട്.
Discussion about this post