ഹിമാചലിലെ ഒരു ഗ്രാമത്തില്‍ ജനിച്ചുവളര്‍ന്ന പെണ്‍കുട്ടി, സിനിമയോടുള്ള അദമ്യമായ ആഗ്രഹം മൂലം വീട്ടിലെ എതിര്‍പ്പുകള്‍ അവഗണിച്ച് മുംബൈയിലെത്തി. നിരവധി പ്രതിസന്ധികളിലൂടെയും അവഗണകളിലൂടെയും കടന്നുപോയി അവസാനം അവള്‍ ബോളിവുഡിന്റെ താരറാണിയായി. ഒരു സിനിമയുടെ വണ്‍ലൈനര്‍ അല്ല ഇത്. കങ്കണ റണൗത്തിന്റെ ജീവിതകഥയാണ്.
2008 ല്‍ ഫാഷന്‍ എന്ന ചിത്രത്തിന്റെ വിജയത്തോടെയാണ് കങ്കണയുടെ ശുക്രദശ ആരംഭിക്കുന്നത്. സിനിമകളില്‍ നിന്ന് ധാരാളമായി ലഭിച്ച പണംകൊണ്ട് മുംബൈ സാന്‍ട്രക്രൂസില്‍ ഒരു ആഡംബര വില്ല അവര്‍ വാങ്ങി. പക്ഷേ കുറച്ചുകാലത്തെ താമസം കൊണ്ടുതന്നെ ഒരു ഹോട്ടല്‍ പോലെയുള്ള ആ വീട് അവര്‍ക്ക് മടുത്തു. അങ്ങനെയാണ് മുംബൈയിലെ പ്രാന്തപ്രദേശമായ ഖാറില്‍ മറ്റൊരു വീട് വാങ്ങിയത്.
കഴിഞ്ഞ മൂന്നുവര്‍ഷമായി ഖാറിലെ അഞ്ചുമുറികളുള്ള ഈ വീട്ടിലാണ് കങ്കണ താമസിക്കുന്നത്. എന്നാല്‍ അടുത്തിടെ തന്റെ കരിയറിനൊപ്പം വീടിനും കങ്കണ ഒരു മേക് ഓവര്‍ നല്‍കി. ഇന്റീരിയര്‍ ഡിസൈനര്‍ റിച്ച ബാല്‍ ആണ് വീടിനു പുതിയമുഖം നല്കാന്‍ കങ്കണയെ സഹായിച്ചത്. തന്റെ ഹിമാചലില്‍ വീടിന്റെ ഓര്‍മകള്‍ നിലനിര്‍ത്തുംവിധമാണ് ഇന്റീരിയര്‍ ഡിസൈന്‍ ചെയ്തിരിക്കുന്നത് എന്ന് കങ്കണ പറയുന്നു.
വീട്ടില്‍ കങ്കണയുടെ പ്രിയ ഇടം കിടപ്പുമുറിയാണ്. പഴയ വീട്ടിലെ രണ്ടു കിടപ്പുമുറികളെ സംയോജിപ്പിച്ച് തന്റെ കിടപ്പുമുറിയും ഡ്രസിങ് റൂമുമാക്കി മാറ്റി. നേരത്തെയുണ്ടായിരുന്ന സ്വിമ്മിങ് പൂളിനെ ഒരുദ്യാനമാക്കി മാറ്റി. മുംബൈ പോലുള്ള ഒരു നഗരത്തില്‍ വെള്ളം പാഴാക്കുന്നത് ശരിയല്ല എന്ന തോന്നലാണ് ഇതിനു താരത്തെ പ്രേരിപ്പിച്ചത്. ഇപ്പോള്‍ അതിഥിമുറിയില്‍നിന്നും പുറത്തേക്കുനോക്കുമ്പോള്‍ പച്ചപ്പും പൂക്കളുടെ മനോഹാരിതയുമാണ് വിരുന്നൊരുക്കുന്നത്. അതിഥിമുറിയുടെ ഒരു മൂലയ്ക്ക് കങ്കണ തന്നെ ഒരു ചെറിയ പൂജാമുറി ഡിസൈന്‍ ചെയ്തിരിക്കുന്നു. ചുരുക്കത്തില്‍ ഈ വീട് കങ്കണയുടെ സ്വകാര്യ സാമ്രാജ്യമാണ്. അതിന്റെ സ്വാതന്ത്ര്യത്തിലും സ്വകാര്യതയിലും അവര്‍ റാണിയെപ്പോലെ ജീവിക്കുന്നു.
Discussion about this post